PCMI Adelina: Masayang Nagdaos ng Church Fun Day para sa Ika-41 Anibersaryo!

Isang masayang pagdiriwang ang naganap noong Hulyo 13-14, 2024, sa PCMI Adelina Church upang ipagdiwang ang kanilang ika-41 anibersaryo. Sa halip na isang tradisyunal na selebrasyon, ginawang sports-themed "Church Fun Day" ang okasyon, kung saan nagkaroon ng mga laro at paligsahan na nagbigay sigla at saya sa lahat. Hinati ang kongregasyon sa apat na koponan, at bawat isa ay nagbigay ng buong lakas para makamit ang tagumpay.

Naging masigla ang unang araw, puno ng pagkakaisa at diwa ng palaro, habang nagpakitang-gilas ang bawat isa sa mga patimpalak ng pagtakbo at badminton. Bagama’t ilang koponan lamang ang nagwagi, ang tunay na tagumpay ay ang mga ugnayang nabuo sa diwa ng sportsmanship.

Pagsapit ng ikalawang araw, sinimulan ang araw sa pag-awit ng papuri at pagsamba sa Panginoon, sinundan ng pangangaral ng Salita ng Diyos mula kay Bishop Andy Padolina. Pagkatapos ng tradisyunal na simba, nagdaos ng sabayang tanghalian ang lahat at naghanda para sa natitirang mga laro. Sa loob ng simbahan, ginanap ang mga larong Mario Kart, Jenga, at iba pang board games. Samantala, sa labas naman ng simbahan, idinaos ang mga larong nangangailangan ng mas malawak na espasyo sa court. May mga hindi inaasahang pangyayari, ngunit nanatiling ligtas ang lahat sa kalinga ng Diyos.

Lahat ay nagsaya at nagpakita ng sportsmanship sa bawat laro. Sa huli, ang Blue Team ang itinanghal na kampeon, subalit walang nakaramdam ng pagkatalo dahil ang lahat ay panalo kay Cristo. Ang Church Fun Day ay hindi lamang isang kumpetisyon kundi isang selebrasyon ng pagkakaisa at pananampalataya, kung saan ang bawat laro ay nagpatibay ng samahan at pagmamahal sa kapwa.